2024/2025

Acollemos mobilidade de grupo de Italia na ESO

Febreiro 2025

En véspera do entroido acollimos no IES e nas familias do noso alumnado de 4º de ESO a oito estudantes de Potenza (Basilicata, Italia), que en compañía do seu profesorado e xunto co noso estudantado durante unha semana participaron en varios obradoiros, actividades e saídas culturais. Un dos eixos vertebradores das actividades foi a temática do entroido, que é celebrado en ambos países con moitas semellanzas que descoñecíamos e que descobrimos grazas ao enriquecemento deste intercambio cultural. 

Mobilidade de grupo de FP en Sicilia (Italia)

Febreiro 2025

Dez estudantes dos ciclos de Atención a Persoas en Situación de Dependencia, Coidados Auxiliares de Enfermería e Xestión Administrativa desfrutaron a oportunidade Erasmus+ a través dunha mobilidade de grupo no Istituto Sciascia e Bufalino de Trapani (Sicilia, Italia); aprendendo e compartindo experiencias co alumnado italiano en diferentes obradoiros e clases. Ademais houbo tempo para visitar lugares como a cidade e as salinas de Trapani, a vila de Erice e a cidade Palermo (un lugar cheo de historia, monumentos e moito ambiente). 

A FP é formación para a vida, e nesta experiencia en Sicilia o noso alumnado viviu en primeira persoa o valor de aprender nun contexto real, coñecendo novas culturas e desenvolvendo as súas competencias profesionais. Sen dúbida, unha viaxe que deixará pegada no noso estudantado. 

Mobilidade de grupo de 4ºESO en Italia

Xaneiro 2025

O noso alumnado de 4º da ESO foi acollido a semana pasada en Potenza (Italia) polo Liceo Rosa Gianturco, co que xa compartimos experiencias o curso pasado dentro do programa Erasmus+.

Alí, as rapazas e rapaces do IES Lauro Olmo realizaron talleres e visitas a museos, viaxaron ata Pompeia, desfrutaron da gastronomía e aprenderon sobre a celebración do entroido en Italia, entre moitas outras actividades.

Agora nós estamos ultimando todos os detalles para a acollida do alumnado e profesorado italiano no noso centro que terá lugar a última semana de febreiro, será toda unha experiencia!

Prácticas de sanidade en Normandía

Xaneiro 2025

Jaziel e Mirella, estudantes que recén acaban de obter a titulación do ciclo medio de formación profesional de Coidados Auxiliares de Enfermería no IES Lauro Olmo, están a vivir a súa experiencia Erasmus+ na rexión de Normandía (Francia). Tras a toma de contacto os primeiros días co centro de prácticas e aloxamento, no fin de semana puideron desfrutar dun día de sol visitando algúns lugares como o famoso Monte Saint Michel. 

Acollemos a mobilidade dun grupo francés en bacharelato

Decembro 2024

Xusto antes do Nadal acollimos no IES Lauro Olmo ao estudantado francés de bacharelato que nos recibira o mes anterior en Chelles. Uns días cargados de actividades relacionadas coa participación na vida democrática, co medio ambiente e coa dixitalización, poñendo fin deste modo a esta mobilidade.

Recibimos a tres docentes da Bretaña francesa

Decembro 2024

A primeira semana de decembro estiveron connosco no instituto Frédéric, Nathalie e Sébastien,  profesorado do Lycée des métiers de l’Automobile de Pont-de-Buis (Bretaña, Francia), que viñeron ao noso centro a través dunha mobilidade de aprendizaxe de observación co fin de compartir e aprender sobre a forma de traballar e organización en ambos centros, especialmente no ámbito de automoción. Así mesmo esta colaboración permitiu establecer canles de colaboración para a acollida e envío de estudantes en prácticas en ambos países no futuro. Unha experiencia que resultou enriquecedora e satisfactoria para todas as partes. 

Mobilidade de persoal de FP en Sicilia (Italia)

Novembro 2024

David, profesor no IES Lauro Olmo, estivo en Trapani (Italia) co programa Erasmus en varias liñas de traballo. Por un lado coñecendo o funcionamento dun instituto de formación profesional, especialmente no ámbito sociosanitario (no que se observaron aspectos interesantes como a presencia educativa de varias figuras docentes e de apoio educativo na aula); por outra parte preparando co centro educativo socio unha próxima mobilidade de grupo na que participarán estudantes dos ciclos de Atención a Persoas en Situación de Dependencia, Coidados Auxiliares de Enfermería e Xestión Administrativa; e por último visitando entidades nas que poidan realizar prácticas o noso alumnado no futuro. No tempo libre a experiencia tamén permitiu descobrir algúns lugares de interese cultural en Sicilia. Agradecemos ao Sepie estas oportunidades e ao centro de acollida a súa hospitalidade

Mobilidade de grupo de 2ºBAC en Francia

Novembro 2024

O alumnado de 2º de bacharelato desfrutou este mes de novembro dunha mobilidade de grupo nun centro educativo en Chelles (Francia), durante unha semana. O alumnado participou en varias clases e talleres coñecendo outro sistema educativo e diferentes metodoloxías de ensino-aprendizaxe, realizou saídas culturais en París e estivo aloxado en familias, o que permitiu mellor coñecemento da cultura, a participación na comunidade local e establecer vínculos persoais co estudantado do "Lycée". Agora tócalle ao IES Lauro Olmo preparar a recepción do alumnado e profesorado francés que visitará o noso centro educativo en decembro!